BANDA MUNICIPAL DE GAITAS DE FORCAREI (PONTEVEDRA)
A idea de fundar a Banda de Gaitas
Municipal de Forcarei, idea que tivo o malogrado alcalde David Raposeiras
Correa, provén dun motivo primordial: Forcarei é terra de gaiteiros. Así reza
unha cantiga tradicional que fala da Terra de Montes.
A Terra de Montes ten
de todo coma en botica
bos canteiros, bos gaiteiros
bos cregos para dicir misa.
Isto vese reforzado pola presenza na súa
historia dun gaiteiro que pasa por ser o mellor representante da música
tradicional galega de todos os tempos, o célebre Gaiteiro de Soutelo, Avelino
Cachafeiro, coroado de tal xeito na compostelá praza da Quintana no mes de
agosto do ano 1924. A pegada e a influencia de Avelino deixouse sentir en toda
a Terra de Montes durante todo o século XX e segue hoxe a ser unha presenza
incuestionable e esencial que fai del un dos piares da cultura local e, por
extensión, da cultura galaica.
Otero Pedrayo dixo de Avelino que era o máis rexo e armoñoso carballo do
bosque antigo, e Castelao non só fixo de cronista da xesta de Avelino na
praza da Quintana, senón que debuxou a figura do Gaiteiro coa cara de Rosalía
no fol da súa gaita, vinculando para sempre dúas figuras históricas e dous
símbolos do noso país.
Falar de Avelino, e tamén do grupo
familiar que el fundou, o célebre cuarteto “Os Gaiteiros de Soutelo”, é falar
dunha época na que os gaiteiros eran pouco menos que os mandadeiros dos deuses,
os embaixadores das musas na terra, seres venerados e admirados polas
multitudes, que poxaban coma posesas para telos nas súas festas e romarías. A
festa que podía contar cos Gaiteiros de Soutelo era unha celebración que tiña o
éxito asegurado.
A festa na honra de Avelino en Soutelo,
consagrada á lembranza daquel músico que asombrou auditorios dos dous lados do
Atlántico e cualificada de Interese Turístico Galego, pasa por ser hoxe un dos
foros de música tradicional máis concorridos e valorados do país galego e
destino obrigado para todo aquel afeccionado á música tradicional que queira
descubrir ou venerar a figura do gaiteiro tradicional na persoa dun dos seus
máis firmes valores ó longo do tempo.
A banda de gaitas municipal de Forcarei
ten como obxectivo primordial a pretensión de ser unha digna herdeira do
espírito de Avelino e do cuarteto “Os Gaiteiros de Soutelo”. Varias pezas do
repertorio dos Gaiteiros de Soutelo forman xa parte tamén do repertorio da
banda, entre elas a célebre Muiñeira de Chantada.
A banda, formada a partir dunha
completa aula de música que vén fomentando a vocación musical das xeracións
máis novas, conta na actualidade con 38 músicos de idades comprendidas entre os
dez e os dezaoito anos. Posúe un forte arraigamento en Forcarei e na Terra de
Montes e ten realizado numerosas actuacións por toda Galicia, en varias cidades
do resto de España e mesmo en Portugal.
Lograr acudir a un certame do fuste e
da talla internacional do Festival de Lorient é unha aspiración de toda
formación de música tradicional que se prece e, no caso da banda de Forcarei,
significa ademais unha especie de irmandamento entre o folclore do país galo e
as imperecedoiras melodías do máximo referente da música tradicional galega.
Levar a Lorient esta agrupación de novos herdeiros do espírito de Avelino supón
a maior tentativa de superación duns músicos novos en anos, pero xa vellos en
horas de ensaio e ilusións postas no camiño que busca a experiencia e a
perfección harmónica día tras día, actuación tras actuación, sempre con ese
referente inmortal que ilumina a senda da tradición dun país enteiro e dun
xeito de entender e de practicar a música máis nosa, a que sae do corazón.
De vivir Avelino, non cabe a menor dúbida de
que se sentiría orgulloso de que os brotes máis novos da árbore que el plantou
estén presentes nun dos templos da música tradicional, onde os deuses do
panteón folclórico outorgan a súa graza e os mortais que alí se congregan
bendicen tamén as maneiras gozosas da melodía que os fai danzar e apreciar a
calidade das notas que no aire deixan a súa máxica pegada.
A embaixada da terra do gaiteiro está, xa que
logo, presta para chegar a terra gala e tratar de engaiolar a todos cos sons
que herdou de Avelino Cachafeiro, máximo representante no olimpo da música
tradicional. E porá todo o seu empeño e a súa preparación en saír triunfante
nesa empresa artística que para todos é un reto do máximo nivel.
(Autor: Francisco Rozados, "Rochi")
bendita sexa a nai do que escribeu esto, esta fenomenal, seguro que é de Terra de Montes
ResponderEliminarNoraboa polas vosas actuacións, estivestes estupendos. Levo algúns días querendo consultar o voso blog pero non me foi posible ata hoxe.
ResponderEliminarDesfrutade desta experiencia única e irrepetible. Seguide na vosa liña porque o estades facendo moi ben. Saúdos para todos e unha aperta moi grande para alguén moi especial.
Saúdos dende Hornillos para todos os que viaxastes a Lorient. Unha admiradora